Незвычайныя экспанаты знаходзяцца ў музеі Беліцкай школы

25 Февраля 2023 1383

Гісторыка-этнаграфічнаму музею «Спадчына», што працуе ў Беліцкай сярэдняй школе, у наступным годзе споўніцца 20 гадоў. Гэта дакладная крыніца гістарычных звестак пра маляўнічы куток Прынёмання. У «Кнізе народнай славы» – імёны і прозвішчы тых, хто славіў малую радзіму руплівай працай, не шкадуючы свайго жыцця, змагаўся за Бацькаўшчыну ў гады Вялікай Айчыннай вайны.

– Шматлікія рарытэты, што захоўваюцца ў музеі, сапраўдны скарб, які быў сабраны вучнямі, настаўнікамі і жыхарамі нашага аграгарадка, – расказвае кіраўнік музея Часлава Валюк. – Сярод іх нямала рэдкіх: дарэвалюцыйныя касцельныя ды царкоўныя выпіскі, кнігі, дакументы, старадаўнія манеты і купюры, прылады сялянскай працы, асабістыя рэчы.

– Як вы лічыце, што за прадмет я трымаю у руках? – запытала ў мяне настаўніца.

Я разгубілася ў сваіх здагадках... «Графін без дна? Навошта ён быў патрэбны?»

– Гэта мухалоўка! – падказвае Часлава Іосіфаўна. – На дно пасудзіны ставілі сподак з салодкай прынадай і адкрывалі корак. А калі муха залятала, корак закрывалі.

У школьным гісторыка-этнаграфічным музеі працуе шэсць пастаянных экспазіцый. Адна з іх прысвечана сялянскаму побыту. Таксама багата прадстаўлена тэма апрацоўкі льну. Некаторыя экспанаты нават паўтараюцца, таму захоўваюцца ў асобным сховішчы. А яшчэ ў музеі сабраны звесткі пра гісторыю аграгарадка, выпускнікоў Беліцкай школы.

Гістарычны матэрыял не толькі беражліва захоўваецца – хлопчыкі і дзяўчынкі карыстаюцца ім пры напісанні навуковых даследаванняў. Аб тым, што вучні робяць гэта ўмела, гавораць шматлікія ўзнагароды: Беліцкая сярэдняя школа – неаднаразовы прызёр конкурсаў не толькі раённага, але і рэспубліканскага ўзроўню.

Трэба сказаць, што дзякуючы ініцыятыве вучняў і настаўнікаў экспанаты гісторыка-этнаграфічнага музея папаўняюцца па цяперашні час. Адна з апошніх «навінак» – аблігацыя вартасцю ў 10 рублёў. Дзяржаўная пазыка развіцця народнай гаспадаркі СССР, датаваная 1953 годам, папоўніла экспазіцыю музея пару гадоў таму. Яе перадала ў фонд музея дырэктар школы Наталля Ясюлевіч.

– Аблігацыі былі знойдзены падчас рамонту страхі ў хаце майго мужа, – расказвае Наталля Яўгенаўна. – «Прывітанне» з СССР было для нас вельмі нечаканым. Цікава, што страху мы перакрывалі ўжо другі раз, але каштоўныя паперы заўважылі толькі цяпер. Зазначу, што, нягледзячы на тое што мінула сем дзесяцігоддзяў, папера вельмі добра захавалася. Адну аблігацыю мы вырашылі пакінуць на памяць, другую перадалі ў школьны музей. Вельмі важна, каб сучасныя дзеці мелі магчымасць дакрануцца да гісторыі, бо нішто так переканаўча не ўплывае на ўспрыманне, як музейныя рарытэты – сапраўдныя сведкі даўніх часоў.