За тры дні да вясны

25 Февраля 2023 1105

Апошнія крокі па лідскай зямлі зіма робіць хоць і няўпэўнена, але паказваючы калючы характар. То снегам лясы замяце, то ледзяным дажджом гарадскія вуліцы палье. А вясна насуперак ёй прыгрэе сонцам, парадуе Ліду блакітам неба. У адказ – усмешкі на тварах лідчан. Радасныя іскрынкі ў вачах сведчаць: менавіта яна, вясна, хутка стане паўнапраўнай гаспадыняй!

І ў прыродзе ўсё нагадвае пра гэта. Чытачы “Лідскай газеты” дасылаюць нам фотаздымкі з коцікамі на лазовых кустах (іх можна ўбачыць на беразе Нёмана) або з падснежнікамі на клумбах каля дамоў. Ды навошта далёка хадзіць – белымі бутончыкамі падснежнікі зацвілі проста пад рэдакцыяй! Прабіліся скрозь тоўшчу снегу. Праходзячы міма, мы таксама радуемся: «Вясна прыйшла ў “Лідскую газету”!»

Добрай навіной, як заўсёды, імкнёмся падзяліцца з вамі, дарагія чытачы, бо найбольшае задавальненне адчуваем менавіта тады, калі ўдаецца парадаваць вас. У жыцці хапае ўсяго: і дабра, і смутку. Вельмі хочацца, каб радасці ўсё ж было болей.

Адчувайце вясну, выходзьце на вуліцы, едзьце ў лес, на бераг рэчкі – вясну вы знойдзеце там! І зірніце на каляндар: тры дні – і вясна!