У Ваверцы адзначылі 600-годдзе парафіі (фота)
У нядзелю 16 чэрвеня касцёл Перамянення Пана ў Ваверцы адзначаў урачыстасць, якая сабрала сотні вернікаў, – 600-годдзе з дня стварэння парафіі, а таксама 85 гадоў з часу асвячэння святыні.
З самага рання каля мясцовага касцёла было шматлюдна. Пакуль адныя шукалі месца, дзе можна было б прыпаркаваць аўтамабіль, другія стаялі ў чарзе, каб набыць абразы, ружанцы, фігуркі Марыі, анёлаў, або ласункі для дзяцей, трэція – мітуліся ў апошніх падрыхтоўках да ўрачыстасці. У гэты час шматлікія святары разам з міністрантамі стаялі каля варот у чаканні галоўнага госця свята – біскупа Гродзенскай дыяцэзіі Аляксандра Кашкевіча. Яго сустракалі хлебам з соллю.
За пару хвілін да пачатку святой імшы пробашч парафіі Перамянення Пана ксёндз Андрэй Роўба прывітаў усіх прысутных. А іх у гэты дзень было болей чым две тысячы чалавек. Акрамя мясцовых вернікаў падзякаваць Богу за 600 год існавання парафіі прыехалі католікі з другіх парафій Лідскага дэканата. Напрыклад, з касцёла Святой Сям’і, што на Рыбіноўскага, быў дэлігаваны цэлы аўтобус. У літургіі прынялі ўдзел прадстаўнікі розных святыняў не толькі з нашага раёну, але і за-за мяжы. Радасць урачыстасці разам з лідчанамі раздзялілі Найвышэйшы настаяцель Ордэна рэгулярных латэранскіх канонікаў Генеральны абат ксёндз Джузэпэ Цыпалоні (Італія), рэгулярныя латэранскія канонікі з Польшчы, святар з Англіі, сёстры законныя. На святкаванні прысутнічалі таксама прадстаўнікі дзяржаўнай улады на чале са старшынёй Лідскага райвыканкама Аляксандрам Астроўскім.
Святую Імшу а адзінаццатая гадзіне раніцы ўзначаліў біскуп Аляксандр Кашкевіч. Падчас літургіі ён звярнуў увагу на тое тое, што 600-годдзе з дня існавання ваверскай парафіі, а таксама 85 гадоў з дня асвячэння мясцовай святыні – важныя даты не толькі для жыхароў Ваверкі. Гэта падзея павінна закрануць сэрца кожнага жыхара Лідскага раёна і нават Беларусі. У гаміліі іерарх нагадаў цікавую і няпростую гісторыю парафіі. Першая хрысціянская супольнасць у Ваверцы з’явілася ў 1413 годзе. Фундатарамі ранейшай парафіі Духа Святога былі мясцовыя ўладальнікі Зыгмунт Галгіновіч і яго маці Зоф’я, дзякуючы якім там быў пабудаваны касцёл. У другой палове 15-га стагоддзя святыня была знішчана. Новую пабудавалі аж у 1736 годзе і прастаяла яна 104 гады. Такім чынам, амаль два дзесяцігоддзі парафія была пазбаўлена душпастырскай апекі, а касцёл выкарыстоўваўся як стайня, а пазней як склад угнаенняў. Сённяшні касцёл, які ў апошнія годы грунтоўна аднаўляецца, быў узведзены ў 1926-1928 гадах. 13 лістапада 1928 года яна была асвечана дэканам Лідскім ксяндзом Іпалітам Баярунцам як касцёл Перамянення Пана. «Напэўна, старэйшыя парафіяне памятаюць, чаго каштавала ўратаванне святыні», – адзначыў біскуп, дадаўшы, што дзякуючы іх адвазе і любові да Хрыстовага Касцёла дом Божы ўдалося захаваць.
Скончылася ўрачыстасць з нагоды 600-годдзя парафіі і 85 гадоў з з часу асвячэння святыні віншаваннямі. Першым словы ўдзячнасці і пажаданні ўсяго самага найлепшага выказаў старшыня Лідскага райвыканкама Аляксандр Астроўскі. На шэрагу з віншаваннямі ён звярнуў увагу на наладжаныя ў нашым раёне добрыя ўзаемаадносіны паміж дзяржавай і духавенствам і запэўніў, што супрацоўніцтва будзе толькі працягвацца і мацнець. “Мы прытрымліваемся аднолькавых матываў у выхаваніі і станаўленні чалавека”, – адзначыў Аляксандр Нікалаевіч. Пробашчу парафіі Перамянення Пана старшыня Лідскага райвыканкама падарыў вазу шклозавода “Неман”, на якой выгравіравана падстава для ўрачыстасці. Біскупу Аляксандру Кашкевічу – намаляваны лідскім художнікам касцёл.
Удзячнасць іерарху Гродзенскаму і Найвышэйшаму настаяцелю Ордэна рэгулярных латэранскіх канонікаў за ўдзел і супольную малітву выказалі таксама парафіяне касцёла Перамянення Пана.
