У Лідскім гістарычна-мастацкім музеі адкрылася выстава “Літва. Гарадзішчы ў фатаграфіях” (фота)
Той, хто хоча ў калядныя і навагоднія святы яшчэ больш сутыкнуцца з таямніцай, пазнаць дагэтуль нязведанае, мае такую магчымасць, наведаўшы выставу “Літва. Гарадзішчы ў фатаграфіях”, якая адкрылася 21 снежня ў Лідскім гістарычна-мастацкім музеі. Работы знакамітага літоўскага фотамайстра Альбертаса Швенчыёніса прадстаўлены на ёй у рамках міжнароднага праекта.
Некаторы час назад выстава “Літва. Гарадзішчы ў фатаграфіях” гасцявала ў Гродне, а зараз на месяц перамясцілася ў Ліду. Каб знаёмства лідчан на дабрачыннай аснове з гэтым кавалачкам літоўскай гісторыі і культуры адбылося, паспрыялі Генеральнае консульства Літоўскай Рэспублікі ў Гродне, лідскае раённае грамадскае аб’яднанне літоўцаў “Рута”. Вялікую падтрымку ў арганізацыі выставы аказаў і Лідскі райвыканкам.
Дэлегацыя літоўскага консульства на чале з Генеральным консулам Генадзіюсам Мацкялісам, прадстаўнікі мясцовай улады прысутнічалі разам з лідчанамі і на ўрачыстым адкрыцці выставы. Звяртаючыся да прысутных, загадчыца сектара ідэалагічнай работы аддзела ідэалагічнай работы, культуры і па справах моладзі райвыканкама Алена Каралевіч падкрэсліла, што адкрыццё выставы – гэта чарговая нагода сабрацца сябрам разам. Алена Аляксееўна пажадала прысутным добрых уражанняў ад знаёмства з цудоўнымі работамі фотамайстра, а таксама павіншавала ўсіх з наступаючымі святамі.
Да слоў Алены Каралевіч далучыўся і Генадзіюс Мацкяліс. Генеральны консул падкрэсліў, што арганізатары выставы рады вітаць усіх, хто наведае яе. Асобна Генадзіюс Мацкяліс выказаў падзяку Лідскаму райвыканкаму, а таксама супрацоўнікам Лідскага гістарычна-мастацкага музея, у зале якога разгорнута выстава.
“Прыемна сутыкацца з людзьмі, якія ад шчырага сэрца выконваюць сваю работу, і зрабілі ўсё магчымае, каб наведвальнікі маглі палюбавацца мясцінамі, увасобленымі ў фатаграфіі”, -- адзначыў ён.
Дырэктар гісторыка-мастацкага музея Ганна Драб да месца згадала, што музей падтрымлівае цесныя, сяброўскія адносіны з літоўскім бокам у рамках трансгранічнага супрацоўніцтва (дарэчы, як і іншыя ўстановы культуры Лідскага раёна). І гэта супрацоўніцтва будзе працягвацца.
Што датычыць наведвальнікаў, якія ўжо з першых хвілін адкрыцця выставы з захапленнем пачалі знаёміцца з прадстаўленымі работамі, то трэба сказаць, што ніхто з іх не застаўся раўнадушным. Энергетыка, якая ідзе ад работ, стварае асаблівы настрой.
-- Адчуванні неперадавальныя, -- казала журналісту “Лідскай газеты” Антаніна Андруконіс, якая прыйшла на выставу з мужам і бацькам. – У мінулым годзе мы былі ў Літве на экскурсіі па гарадзішчам. Даведаліся тады шмат цікавай інфармацыі, і сёння, дзякуючы выставе, яна зноў усплывае ў памяці. Калі закрануць выкананне саміх работ, то мне асабліва падабаюцца тыя, ракурс якіх зверху на аб’ект. Гэта прыдае ім яшчэ большую загадкавасць.
Што датычыць самаго аўтара гэтага матэрыяла, то ў яго самае найбольшае ўражанне пакінула фотаработа, на якой над курганом блішчыць яркая зорка. Яна так і вабіць сваім цёплым, пранікнёным святлом у свет пазнання…
