Ходараўцы спяваюць – да ягаднай асалоды запрашаюць. У аграгарадку прайшло брэндавае свята

01 Августа 2023 671
Слова “брэнд” усё часцей асацыіруецца ў нас не толькі з гандлёвай маркай, але і выкарыстоўваецца як візітная картка рэгіёна або пэўнага мястэчка. І Лідчына не выключэнне! Так, на брэнд аграгарадка Гуды прэтэндуе бульба, Дворышча славіцца сваімі блінамі і аладкамі, а Тарнова – яблыкамі. Цяпер ёсць асабістая “візітка” і ў Ходараўцаў: ягадны фэст тут ладзяць ужо другі год. 

Пірог з журавінамі, жэле з суніцамі, вішнёвая настойка, соус з жымаласці, парэчкавы джэм… Сёлета мясцовыя гаспадыні нагатавалі столькі, што ад іх страў ламаліся сталы. І, канечне, ніводны госць не пайшоў са свята з пустым жыватом. На ягадным фэсце ў Ходараўцах ласункамі накармілі і журналіста “Лідскай газеты”. 

Са свайго поля ягада!

Дзесьці гуркі добра прыжыліся, дзесьці  памідоры растуць на славу. А ў аграгарадку Ходараўцы заўседы збіраюць добры ўраджай ягад. 

–  Наш населены пункт з усіх бакоў акружаны лесам, дзе ўдосталь растуць чарніцы, суніцы, журавіны, ажыны і маліны... Гэтых дароў лесу нам хапае не толькі на ежу, але і на продаж, – расказвае мясцовая жыхарка Ірына Вітко (на фота злева). 

Акрамя лясных дароў, шмат ягадных культур тутэйшае насельніцтва выророшчвае і на сваіх сядзібах. Агрэст, чарэшня, фізаліс, жымаласць і, канешне, клубніцы прапісаліся амаль на кожным ходараўскім агародзе. Дык чаму ж не ўшанаваць ягадныя культуры, якія нам так даспадобы? – паразважалі вяскоўцы і вырашылі наладзіць сваё асабістае свята. Нават гучны слоган прыдумалі: “Ходараўцы спяваюць – да ягаднай асалоды запрашаюць”. 

Дарэчы, у той дзень Ходараўцы сапраўды спявалі. Канцэртная праграма разгарнулася каля сельскага клуба. На імправізаваную сцэну са сваімі музычнымі нумарамі выходзілі не толькі мясцовыя спевакі, але і артысты Беліцкага, Першамайскага і Ганчарскага дамоў культуры. 

Падчас ягаднага фестывалю працавалі дзіцячыя атракцыёны і выязны гандаль. Гульнёвывы настрой падтрымлівалі і вядучыя, штораз прапаноўваючы прыняць удзел у конкурсах, паразважаць над загадкамі і ўразіцца навуковымі фактамі. 

– А ці ведеце вы, якая ягада захоўвае сваё насенне звонку, а не ўнутры? – пытаецца ў прысутных вядучы. 

– Клубніцы! – адказваюць кемлівыя госці. 

– А ці ведаеце вы, што, з пункту гледжання батанікі, памідор, баклажан, кабачок, бульба, ківі, кавун, дыня і гарбуз таксама з’яўляюцца ягадамі? – не сунімаецца вядучы.      

– А гэта факт! – пацверджваюць прысутныя.

 Алесь Савіцкі, 10 год, горад Іўе (на фота з бабуляй):

– Летнія канікулы я праводжу ў сваёй бабулі ў весцы Дзікушкі. Калі дачуўся, што ў суседнім мястэчку плануецца раённае свята, пачаў прасіцца паехаць туды. Паўгадзіны на ровары – і мы ўжо на месцы. Падабаецца, што тут шмат забаў для дзяцей: я ўжо паспеў пакідаць дзіду, з’есці цукровую вату і купіць ласункі для сваіх сяброў, якія не змаглі прыехаць”. 

– Я нарадзілася і вырасла ў Ходараўцах, але цяпер жыву са сваёй сям’ёй у Гродна. Сёння прыехала на малую радзіму наведаць бацькоў і вельмі здзівілася: якое дзіўнае свята тут адбываецца! – дзеліцца ўражаннямі Наталля Ваўчкевіч. – Насамрэч, вяскоўцам вельмі не хапае такога бесклапотнага адпачынку, дзе яны маглі б на некаторы час забыцца пра хатнія справы, сустрэцца з суседзямі, пагутарыць і паспяваць. Таму лічу, што ягадны фэст – бліскучая ідэя. Я і мой маленькі сынок вельмі добра бавім тут час.

Рай для ласуноў

Але ж які ягадны фэст без духмяных пачастункаў?! Пірог з журавінамі, жэле з суніцамі, вішневая настойка, соус з жымаласці, парэчкавы джэм… Сёлета мясцовыя гаспадыні нагатавалі столькі, што ад іх страў ламаліся сталы. Ірына Вітко, якая жыве ў Ходараўцах больш за 30 год, рыхтавалася да свята яшчэ з вечара: пякла, смажыла, варыла і нават жэліравала. Усе яе стравы атрымаліся такімі смачнымі, што людзі цікавіліся: “А рукі ў гэтай жанчынкі, часам, не залатыя?” Ірына сціпла аджартоўвалася, але з ахвотай дзялілася рэцэптамі сваіх кулінарных шэдэўраў. Адзін з іх друкуем на старонках нашага выдання:

Лімонна-малінавы мікс

Працёртыя маліны з лімонам – гэта не толькі кладзезь вітамінаў, але смачная і штматфункцыянальная страва. Яе можна ўжываць у якасці начыння для пірагоў і вушак, падаваць да тварагу ці бліноў або проста есці лыжкаю як дэсерт. У спякотны дзень з такога лімонна-малінавага міксу атрымліваецца жыватворны морс, а зімой, падчас сезонных хвароб, яго добра заварваць як лекавы чай. А гатуецца так:

• 1 літр малінаў,
• 600 грамаў цукру,
• 1 лімон з лупінай.
Усё старанна працерці блэндарам, разліць у посуд і замарозіць. Спажываць па меры неабходнасці. Смачна есці! 

Ягадны фестываль ў аграгарадку Ходараўцы атрымаўся настолькі шчырым, гасцінным і смачным, што няма сумненняў: у наступным годзе ён абавязкова будзе мець паўтарэнне.


Поделиться
0Комментарии
Авторизоваться