Каб папярэдзіць агонь на жытнёвых палях

06 Августа 2022 3139

Нарэшце ізноў настала для жніва спрыяльнае надвор’е: скончыліся дажджы. Але з гарачынёй прыйшла для вырашчанага ўраджаю іншая небяспека – пажарная.

Каб папярэдзіць гэту бяду, пракантраляваць выкананне ўсіх правіл пажарнай бяспекі пры палявых работах, штодзённа туды выязджаюць дзве аператыўныя групы супрацоўнікаў раённага аддзела па надзвычайных сітуацыях. З адной з такіх груп, якую ўзначальваў начальнік райаддзела Дзмітрый Бяляўскі, у рэйд адправіўся і карэспандэнт “Лідскай газеты”.

Па дарозе Дзмітрый Іванавіч расказаў, што ўсе работнікі сельгапрадпрыемстваў, якія задзейнічаны на ўборцы ўраджаю, яшчэ да яе пачатку прайшлі навучанне па пажарна-тэхнічным мінімуме і атрымалі адпаведныя пасведчанні. Каб пазбегнуць гібелі ўраджаю на полі, там павінна пастаянна прысутнічаць спецыяльная тэхніка: трактар з плугамі (які ў прафілактычных мерах абворвае абочыну поля, каб, напрыклад, выкінуты акурак не падпаліў іржышча або, пры ўзгаранні поля, павінен абараць ачаг і перашкодзіць агню распаўсюдзіцца па ўсёй плошчы), і іншая тэхніка для тушэння пажара. Некаторыя сельгаспрадпрыемствы (як ААТ “Лідахлебапрадукт) заключаюць дамовы з аддзелам па надзвыйчайных сітуацыях, і тады на полі са спецтэхнікай дзяжураць яго супрацоўнікі, іншыя маюць абучаных людзей сярод сваіх работнікаў (дабравольныя дружыны) і забяспечваюць гэты працэс самі.

Наш маршрут пралягаў праз прыгожыя мясціны Панямоння: рознакаляровыя палісаднікі вёсак змяняліся разнатраўем лугоў і зеленню лясоў. Вось мы на жытнёвым полі, якое належыць КСУП “Пескаўцы”.

І тут нас чакала непрыемнасць: на рагу гэтага поля адна з апор электраперадач была нахілена і трымалася толькі на правадах, якія ў любы час маглі парвацца і ўпасці на зямлю або зачапіць таго, хто быў побач. Без перабольшвання, склалася смяротная небяспека. Рэакцыя Дзмітрыя Іванавіча была імгненнай: ён патэлефанаваў у раённую службу электрычных сетак і паведаміў пра здарэнне. Была накладзена забарона працаваць у небяспечнай зоне, а наводдаль, каб не падвяргаць рызыцы жыццё і здароўе людзей, быў выстаўлены пост. Дарэчы, як потым высветлілася, работнікі сельгаспрадрыемства яшчэ да нашага прыезда таксама паведамілі аб гэтым ў РЭС, і рамонтная брыгада ўжо накіроўвалася туды для прадухілення бяды.

І толькі потым супрацоўнікі райаддзела прыступілі да праверкі наяўнасці і спраўнасці вогнетушыцеляў на камбайнах і ў машынах, якія задзейнічаны на адвозцы зерня; тэхнікі з практычнай падачай вады. Работу трактара з плугамі мы ўбачылі здалёк, яшчэ пры пад’ездзе да поля.

Трэба аддаць належнае, грубых парушэнняў выяўлена не было. Усе рабочыя заўвагі і пажаданні супрацоўнікамі КСУП “Пескаўцы” былі выслуханы спакойна, нават зацікаўлена.

Падводзячы вынік рэйда, Дзмітрый Бяляўскі паведаміў, што падчас праверак і ў іншых гаспадарках, куды выязджалі раней, таксама вялікіх недахопаў не заўважана. Людзі адказна адносяцца да сваёй працы, прадухілення небяспечных сітуацый і, што не менш важна, шмат увагі надаюць захаванню паспелага ўраджаю.