У Лідзе каталіцкі душпастыр службы аховы здароўя раёна асвяціў аўтамабілі хуткай дапамогі (фота)
Каб шлях быў бяспечным, вернікі з малітвай звяртаюцца да святога Хрыстафора. Ён лічыцца апекуном кіроўцаў, маракоў, падарожнікаў і пілігрымаў, і яго імя Каталіцкі Касцёл узгадвае 25 ліпеня. З гэтай нагоды капелан Лідскай цэнтральнай раённай бальніцы ксёндз Юрый Беганскі сёння асвяціў аўтамабілі хуткай дапамогі.
Як адзначыла журналісту “Лідскай газеты" загадчыца станцыяй хуткай медыцынскай дапамогі Алена Дапіра, увага да лекараў з боку святароў, будзь-то каталіцкіх або праваслаўных, заўсёды прыемна. "Вядома, кожны з нас у абрад асвячэння ўкладвае нешта сваё. Але агульнае для ўсіх жаданне – гэта як мага менш экстраных выклікаў і як мага больш добрых вынікаў”, – адзначыла Алена Аляксандраўна.
На стаянцы станцыі хуткай медыцынскай дапамогі душпастыр службы аховы здароўя раёна прачытаў малітву, а таксама пажадаў вадзіцелям аўтамабіляў бесперашкоднай дарогі, каб яны заўсёды паспявалі своечасова прыбыць да тых, хто мае патрэбу, а ўрачы – своечасова аказаць хворым неабходную дапамогу.
– Хачу пажадаць усім міру, таму што кожная хай сабе і маленькая вайна наносіць адбітак на здароўе людзей, якое лекарам потым даводзіцца лячыць, – акцэнтаваў ксёндз Юрый Беганскі. – Касцёл таксама нагадвае, што не варта ставіцца да асвячэння аўтамабіля як да нейкага магічнага рытуалу. Асвячэнне транспартных сродкаў – не гарант таго, что машына ніколі не трапіць у аварыю. Асвячоны – значыць, прысвечаны Богу.
Да ведама: станцыя хуткай медыцынскай дапамогі мае 3 спецыялізаваныя выязныя брыгады (інтэнсіўнай тэрапіі, кардыялагічнай і педыятрычнай), 4 лекарскія лінейныя брыгады і 4 фельчарскія выязныя брыгады. Яны аказваюць экстранную медыцынскую дапамогу насельніцтву кругласутачна ва ўсе дні тыдня. Выклік брыгады станцыі хуткай медыцынскай дапамогі ажыццяўляецца па тэлефоне 103.
