Прыём правялі дэпутаты

22 Сентября 2023 1155

На мінулым тыдні на Лідчыне прайшоў Адзіны дзень дэпутата. У гэты дзень народныя абраннікі Гродзенскага абласнога, Лідскага раённага, Бярозаўскага гарадскога, сельскіх Саветаў дэпутатаў правялі прыём грамадзян. Нагадаем: у мясцовых Саветах жыхароў нашага рэгіёна прадстаўляюць 8 дэпутатаў абласнога Савета, 33 – раённага, 17 – Бярозаўскага гарадскога, 126 – сельскіх Саветаў дэпутатаў. Безумоўна, дэпутаты па родзе сваёй дзейнасці на пастаяннай аснове вядуць прыём выбаршчыкаў, і звярнуцца да іх не складае праблемы. Аднак на гэты раз прыём насіў маштабны характар.

– Падобная форма правядзення прыёму грамадзян не новая, – кажа старшыня Лідскага раённага Савета дэпутатаў Інэса Белуш. – Прыклад нам у гэтым паказвае Савет Рэспублікі. Яго члены на чале са старшынёй Наталляй Качанавай выязджаюць у пэўны рэгіён краіны, дзе сустракаюцца з людзьмі, цікавяцца пытаннямі, якія іх хвалююць, і не толькі прымаюць самы актыўны ўдзел у вырашэнні, але і робяць высновы, з якімі асноўнымі праблемамі сутыкаюцца мясцовыя жыхары.

Падобныя высновы былі зроблены і пасля таго, як дэпутаты Лідчыны правялі прыём грамадзян. Звароты, нягледзячы на тое што часам да народнага абранніка прыходзілі групай у некалькі чалавек, не мелі нейкага глабальнага характару. Былі сярод іх пытанні, якія могуць быць вырашаны на мясцовым узроўні (дарэчы, і адразу вырашаліся на месцы), а таксама тыя, якія патрабуюць тлумачэння, кансультацыі. Не абышлося без падзяк.

Старшыня раённага Савета дэтутатаў Інэса Белуш праводзіла прыём грамадзян у аграгарадку Мажэйкава. Нядаўна тут адбыліся раённыя дажынкі. Як адзначае Інэса Генадзьеўна, мясцовыя жыхары з цяплом гаварылі пра тое, што правядзенне мерапрыемства не абмежавалася ўручэннем узнагарод і канцэртам. Да імпрэзы загадзя вялася падрыхтоўка: былі выдзелены бюджэтныя сродкі, каб зрабіць пэўнае добраўпарадкаванне. Яно, дарэчы, з правядзеннем дажынак не спыніцца, а будзе працягвацца.

– Мне вельмі прыемна было даведацца пра факт сумеснай працы на агульную карысць, – кажа Інэса Генадзьеўна. – Калі дарожнікі, якія вялі добраўпарадкаванне дарогі, папрасілі насельніцтва падрыхтаваць тэрыторыю на вуліцы ля сваіх участкаў пад асфальтаванне, многія з разуменнем і ахвотай адгукнуліся. Я ўпэўнілася, што жыхары Мажэйкава неабыякава ставяцца да вырашэння не толькі сваіх асабістых пытанняў, але і пытанняў населенага пункта ў цэлым. Наконт гэтага маюцца планы.

Нельга не адзначыць, што ў час свайго прыёму ў рамках Адзінага дня дэпутата некаторыя народныя абраннікі імкнуліся адразу вырашаць пытанне, з якім звярнуўся чалавек. Так, на прыём да дэпутата абласнога Савета Анатоля Вялікіна прыйшлі грамадзяне і расказалі, што на могілках у вёсцы Навіцкія-2 расце векавая хвоя, у дупле якой “кватаруюць” шэршні. Гэта стварае небяспеку для тых, хто наведвае магілы сваіх родных. Анатоль Леанідавіч адразу звязаўся з начальнікам Лідскага РАНС Дзмітрыем Бяляўскім, а той, у сваю чаргу, са старшынёй Траццякоўскага сельскага Савета Аляксандрам Хвайніцкім. Быў агавораны спосаб вырашэння пытання і неадкладна прыняты меры.

Анатоль Вялікін пытанні выбаршчыкаў вырашае без прамаруджвання.

Звярнуліся да Анатоля Вялікіна і жыхары вёскі Дуброўня Дубровенскага сельсавета з просьбай аказаць садзеянне ў правядзенні грэйдзіравання праезнай часткі на вуліцы Узорнай і падсыпцы з’езда з дарогі Ліда – Ліпнішкі на гэтую вуліцу. І зноў жа дэпутат звязаўся з кіраўнікамі адпаведных арганізацый – Дубровенскага сельскага Савета і ДРБУ-157, якія, як аказалася, ведаюць пра гэтую праблему і гатовы зрабіць пэўныя захады для яе вырашэння.

– Мяне вельмі кранула, што грамадзяне вялі са мной, як з дэпутатам, размову шчыра, выказвалі свае станоўчыя меркаванні па розных тэмах, – зазначае Анатоль Вялікін.
Прыём вядзе Андрэй Жамойда.

Грунтоўныя размовы з тымі, хто прыйшоў на прыём, вялі і іншыя дэпутаты. Жыхары вуліцы Хасанаўскай, напрыклад, не прамінулі выкарыстаць магчымасць трапіць на прыём грамадзян, каб звярнуцца да дэпутата Гродзенскага абласнога Савета, дырэктара ДП ”Конус” Андрэя Жамойды. Зварот не выпадковы: прадпрыемства знаходзіцца побач з аб’язной дарогай, якая будуецца. Людзі прасілі Андрэя Пятровіча знайсці адказ на пытанні: ці будзе завершана будаўніцтва згодна з намечаным графікам і як будзе ажыццяўляцца рух на вуліцу Хасанаўскую? Дэпутат звязаўся па тэлефоне з кіраўніком будаўнічай арганізацыі, якая выконвае работы, – ДБУ-24 – Генрыхам Шырокім. Падрабязныя адказы задаволілі наведвальнікаў.

Безумоўна, дэпутацкая дзейнасць – гэта грамадская работа. Кожны народны абраннік працуе на пэўнай пасадзе, у яго непасрэднай кампетэнцыі знаходзіцца вырашэнне пэўнага кола пытанняў. Гэта ўлічвалі жыхары Лідчыны і мэтанакіравана звярталіся да дэпутатаў.

Так, да дэпутата абласнога Савета дэпутатаў Леаніда Валадося грамадзяне звярталіся па пытаннях працаўладкавання, добраўпарадкавання тэрыторыі, сацыяльных і жыллёва-бытавых пытаннях.
Яўген Серпук

Дэпутатам раённага Савета дэпутатаў Валерыю Касяку і Яўгену Серпуку давялося вырашаць пытанне па працаўладкаванні грамадзян.

Наведвальніца, якая прыйшла на прыём да дэпутата раённага Савета Таццяны Петух, вяла гутарку пра льготы для шматдзетных сем’яў.

Як было адзначана вышэй, прыём грамадзян у Адзіны дзень дэпутата вялі і дэпутаты сельскіх Саветаў. Так, напрыклад, у Тарноўскім сельсавеце, акрамя старшыні сельскага Савета Валянціна Астраўца, жыхары маглі звярнуцца да дэпутатаў Антона Сурвілы, Наталлі Бучы, Соф’і Шыш, Яніны Бурбліс і іншых. А людзей хвалявалі такія пытанні, як узаемаадносіны паміж суседзямі, уборка аварыйных дрэў, вываз смецця і добраўпарадкаванне тэрыторыі. Усе гэтыя пытанні будуць вырашацца ў рабочым парадку.

Што датычыцца правядзення агульных прыёмаў у Адзіны дзень дэпутата, то плануецца, што яны будуць практыкавацца і надалей.