Абраны птушыны сімвал раёна. Ім стала белая чапля
Народнае галасаванне па выбары пярнатага сімвала Лідскага рэгіёна завяршылася. Большасцю галасоў перамога дасталася…
Але перш чым аб'явіць вынікі, хацелася б нагадаць, што лідчанам былі прапанаваны тры кандыдаты: цецярук, белая чапля і дрозд-рабіннік – усе гэтыя віды, акрамя таго што жывуць на тэрыторыі раёна, яшчэ і з'яўляюцца значнымі ў нацыянальным і нават міжнародным маштабе. А значыць – прывабнымі для фотааматараў, турыстаў.
Галасаванне адбывалася ў сацыяльных сетках “Аднакласнікі” і “ВКонтакте” розных груп. Найбольш актыўна наконт лепшага ў іх разуменні татэма лідчане выказвалі сваю пазіцыю ў групах “Лідскай газеты”: за тры тыдні тут назбіралася амаль 180 “галачак”, і гэта без малога палова ад усёй колькасці галасоў. У выніку на трэцім месцы спыніўся дрозд-рабіннік, на другім – цецярук. Безумоўным лідарам жа стала белая чапля – за яе прагаласавалі 224 чалавекі.
Што далей? Гэта мы спыталі ў дырэктара Лідскага раённага экалагічнага цэнтра дзяцей і моладзі Жанны Цехановіч, якая непасрэдна курыруе гэтае пытанне. Як патлумачыла Жанна Мікалаеўна, у бліжэйшы час будзе накіраваны ліст у Лідскі райвыканкам – на афіцыйнае зацвярджэнне птушкі-сімвала рэгіёна па выніках народнага галасавання (гэтае пытанне разгледзяць на бліжэйшай сесіі раённага Савета дэпутатаў (як мы даведаліся ў яго старшыні Інэсы Белуш, мерапрыемства запланавана на ліпень)).
Далей будзе распрацаваны план мерапрыемстваў па папулярызацыі пярнатага татэма. Напрыклад, у іншых гарадах Беларусі, дзе птушка-сімвал ужо зацверджана, яе вобраз шырока выкарыстоўваюць на сувенірнай прадукцыі, у добраўпарадкаванні горада (у выглядзе малых архітэктурных формаў, графіці на будынках).
– За парадай, як зрабіць белую чаплю брэндам Лідскага раёна, мы таксама звернемся да ініцыятараў ідэі – грамадскай арганізацыі «Ахова птушак Бацькаўшчыны», – у іх ужо маецца напрацаваны вопыт, які можа быць нам карысным, – дадала Жанна Цехановіч. – Як бы там ні было, аб тым, што белая чапля з'яўляецца сімвалам Лідскага раёна, будзе заяўлена гучна!
