Настаўнік фізікі СШ №1 горада Ліды: «Веды – гэта дар, якім хочацца дзяліцца»
Да кожнага вучня настаўнік фізікі сярэдняй школы № 1 горада Ліды Святлана Кулевіч знаходзіць індывідуальны падыход. На яе ўроках, дзе пануе атмасфера добразычлівасці, узаемнай павагі, хлопчыкі і дзяўчынкі працуюць добрасумленна, радуюцца поспехам таварышаў, вучацца пазнаваць навакольны свет.
– Заўсёды ведала, што педагагічная праца – маё прызванне, – распавядае Святлана Кулевіч. – Таму, атрымаўшы атэстат сталасці, у 1998 годзе паступіла на фізіка-тэхнічны факультэт Гродзенскага дзяржаўнага ўніверсітэта імя Янкі Купалы. А калі прайшла першую практыку ў школе як настаўнік фізікі, зразумела, што ў выбары будучай прафесіі не памылілася. Веды – гэта дар, якім хочацца дзяліцца.
Настаўніцы падабаецца працаваць з дзецьмі, раздзяляць з імі іх поспехі і дасягненні. У той жа час, каб адчыніць дзверы ў займальны свет навукі, трэба шмат ведаць, быць заўсёды ў пошуку новага матэрыялу. Святлана Мікалаеўна – чалавек, які ўмее захапіць сваім прадметам і павесці за сабой. Яе педагагічнае крэда – заўсёды самаўдасканальвацца, быць мудрым настаўнікам і добрым сябрам для дзяцей.
– Не сакрэт, што прафесійнае станаўленне любога педагога залежыць у першую чаргу ад калектыву, у якім ён працуе, – заўважыла Святлана Кулевіч. – І я вельмі рада, што калісьці сцяжынка лёсу прывяла мяне менавіта ў сярэднюю школу № 1. Наша школа – гэта дзіўны свет, у якім жыве і працуе згуртаваная сям'я сапраўдных прафесіяналаў сваёй справы. Калектыў вопытных педагогаў робіць усё для таго, каб кожны вучань адчуваў сябе камфортна і паказваў высокія вынікі вучобы, удзельнічаў у даследчай дзейнасці, спартыўных і культурных мерапрыемствах.
Быць настаўнікам – адказная праца, таму што неабходна не толькі вучыць дзяцей, але і займацца самаадукацыяй. Адданасць любімай справе, працавітасць, аптымізм... І гэта не ўсе якасці, якімі валодае гераіня артыкула. Лепш за ўсіх свайго педагога ведаюць вучні.
– Дзень настаўніка – асаблівае свята, бо ўсё закладзенае ў нас людзьмі гэтай выдатнай, важнай і патрэбнай прафесіі вызначае наш далейшы лёс, – заўважылі вучні 8 «В» класа. – Святлана Мікалаеўна – наш любімы настаўнік фізікі і класны кіраўнік. Мы ўдзячны ёй за цярпенне, увагу, мудрасць, разуменне і падтрымку. За два з лішнім гады, што мы разам, яна прывіла нам любоў да ведаў, здолела аб'яднаць клас у адну дружную каманду, за што мы вельмі ўдзячныя нашаму любімаму педагогу.
Кажуць, што асабліва шчаслівае тое дзіця, якому сустрэўся настаўнік, які ўмее данесці не толькі веды, але і любоў. Святлана Мікалаеўна стала для многіх хлопцаў і дзяўчат не толькі настаўнікам, але і другой мамай. Яна яскравы прыклад педагога нашага часу.
