Каб Беларусь жыла, працвітала – Колас ёсць і Купала

17 Марта 2023 882

Дзве зоркі, дзве светлыя аповесці, каласкі беларускай нівы – усё гэта пра галоўных класікаў беларускай літаратуры Янку Купалу і Якуба Коласа. Мінулы год быў юбілейны для песняроў беларускага слова. Сёння памяць пра іх захоўваюць музеі, бібліятэкі, названыя ў іх гонар вуліцы, тэатры, інстытуты і плошчы.

Пад знакам 140-гадовага юбілею Янкі Купалы і Якуба Коласа сярод бібліятэк-філіялаў ДУК “Лідская раённая бібліятэка імя Я. Купалы” быў праведзены прафесійны конкурс на лепшае бібліятэчнае мерапрыемства “Каб Беларусь жыла, працвітала – Колас ёсць і Купала”.

Мэта конкурсу заключалася ў прапагандзе творчасці знакамітых песняроў беларускага народа, а сярод асноўных задач – паглыбленне ведаў пра жыццё і творчы шлях класікаў беларускай літаратуры; азнаямленне чытацкай аўдыторыі бібліятэкі з цікавымі, малавядомымі фактамі з жыцця народных пісьменнікаў; выхаванне і развіццё ў чытачоў прыхільнасці да беларускай літаратуры і яе мастацкіх здабыткаў; раскрыццё бібліятэчнага фонду, у прыватнасці, друкаваных інфармацыйна-біяграфічных і мастацкіх дакументаў, звязаных з творчасцю беларускіх паэтаў і інш.

Ва ўрачыстай абстаноўцы за плённую працу і творчы падыход да арганізацыі мерапрыемства Дыпломам І ступені ўзнагароджаны філіял “Лідская гарадская бібліятэка № 4” за літаратурна-музычнае падарожжа “Песняры беларускай душы”; Дыпломам ІІ ступені ўзнагароджаны філіял “Лідская гарадская бібліятэка № 1” за інтэлектуальную гульню “Што? Дзе? Калі?”; Дыпломам ІІІ ступені ўзнагароджаны філіял “Лідская гарадская бібліятэка № 2” за літаратурны рынг “З родным словам ды з беларускай душою”.

Пасля падвядзення вынікаў за мінулы год усе бібліятэкі Лідчыны былі запрошаны да ўдзелу ў конкурсах, запланаваных на 2023 год. Прафесійны бібліятэчны конкурс электронных відэавізітак аматарскіх аб’яднанняў і клубаў па інтарэсах “Гонар маёй бібліятэкі” прадэманструе ўсю разнастайнасць іх напрамкаў і тэматык, а дзякуючы конкурсу кніжных інсталяцый “Город наших сердец”, прысвечанаму 700-годдзю г.Ліды, бібліятэкі разам з ўсім горадам і раёнам акунуцца ў паток святочных мерапрыемстваў да значнай юбілейнай даты.