Праца – у радасць. У Лідскім раёне прайшла рэспубліканская дабрачынная акцыя «Аднаўленне святынь. Скарбы роднай Беларусі»

24 Октября 2020 1084

У рамках раённага этапу акцыі аб'ектамі клопату моладзі сталі храм Святой блажэннай Матроны Маскоўскай у пасёлку Першамайскім, храм Хрыста Збавіцеля па вуліцы Гастэлы ў горадзе Лідзе, касцёл Перамянення Гасподняга ў аграгарадку Ваверка, а таксама «Іаанава крыніца» ў вёсцы Феліксава Мажэйкаўскага сельсавета.

Валанцёры Лідскай раённай арганізацыі ГА «БРСМ» ачысцілі тэрыторыі ад апалай лістоты і сухастою, сабралі смецце, прапалолі і прывялі ў парадак клумбы.

– Рэспубліканская дабрачынная акцыя рэалізуецца з мэтай выхавання і развіцця ў падрастаючага пакалення духоўна-маральных каштоўнасцей, заснаваных на традыцыях беларускага народа, шырокага ўключэння маладых людзей у працэс працоўнай дзейнасці, накіраваны на добраўпарадкаванне і аднаўленне культавых аб'ектаў, – падкрэсліла першы сакратар Лідскага РК ГА «БРСМ» Вольга Міхаловіч. – Было вельмі прыемна, што кожны з юнакоў і дзяўчат ахвотна ўключыўся ў працу. Гэта не можа не радаваць.

Удзельнікі акцыі ўпэўненыя, што ўдзел у падобных мерапрыемствах не толькі дапамагае прывесці ў парадак тэрыторыю ля святынь Лідчыны – гэта яшчэ і ўнікальная магчымасць здзейсніць добрыя справы.