Чарговае прызнанне: супрацоўнікі «Лідскай газеты» узнагароджаны на абласным узроўні за асабісты ўклад у развіццё сродкаў масавай інфармацыі
Учора, 11 мая, ў малой зале Гродзенскага абласнога драматычнага тэатра прымалі віншаванні і заслужаныя ўзнагароды прадстаўнікі сродкаў масавай інфармацыі Гродзенскай вобласці. Мерапрыемства было прымеркавана да Дня друку, Дня работнікаў радыё, тэлебачання і сувязі. І патрэбна адзначыць, што ў такім фармаце святочная імпрэза для работнікаў СМІ і друкарняў праходзіла на Гродзеншчыне ўпершыню за многія гады.
Зусім не выпадкова ў ліку прысутных былі і прадстаўнікі «Лідскай газеты». Пачатак гэтага года для калектыву рэдакцыі аказаўся найбольш плённым. Адразу некалькімі высокімі ўзнагародамі папоўнілася творчая скарбонка журналістаў. Любімая многімі чытачамі раёнка – лаўрэат XIII Нацыянальнага конкурсу друкаваных сродкаў масавай інфармацыі «Залатая Літара». У намінацыі «Друкаваныя СМІ і інфармацыйныя агенцтвы» – пераможца рэспубліканскага конкурсу сярод журналістаў і сродкаў масавай інфармацыі на лепшае асвятленне пытанняў міжнацыянальных і міжканфесійных адносін, міжкультурнага дыялога ў Рэспубліцы Беларусь і супрацоўніцтва з суайчыннікамі за мяжой. Высока ацаніла дзейнасць калектыву і абласная выканаўчая ўлада. За шматгадовую плённую працу, высокі прафесіяналізм, асабісты ўклад у развіццё сродкаў масавай інфармацыі галоўны рэдактар выдання Кацярына Серафіновіч узнагароджана Ганаровай граматай Гродзенскага абласнога выканаўчага камітэта. Ганаровую грамату галоўнага ўпраўлення ідэалагічнай работы, культуры і па справах моладзі аблвыканкама атрымала загадчык аддзела камп'ютарнага дызайну Галіна Уласенка.
Аб'ектыўнасць, талерантнасць, камунікабельнасць, аператыўнасць, пісьменнасць, інтэлектуальнасць... Сёння гэтыя і многія іншыя якасці ўласцівыя журналістам Гродзенскай вобласці. Таму невыпадкова прыгадваліся ў гэты дзень і словы Прэзідэнта Рэспублікі Беларусь. Выступаючы на семінары кіруючых работнікаў рэспубліканскіх і мясцовых дзяржаўных органаў кіравання, Аляксандр Лукашэнка адзначыў: журналістыка – прафесія дзяржаўная, у тым сэнсе, што журналіст, як ніхто іншы са спецыялістаў сацыяльнай сферы, можа самым актыўным чынам уплываць на працэсы, якія адбываюцца ў краіне, фарміраваць грамадскае меркаванне аб падзеях і з'явах нашага жыцця. Гэтым абумоўлена сапраўды дзяржаўная адказнасць кожнага, хто вядзе размову з чытачом, слухачом, тэлегледачам.
І гэта размова сапраўды мае месца. Гэта ў сваёй віншавальнай прамове таксама адзначыў начальнік галоўнага ўпраўлення ідэалагічнай работы, культуры і па справах моладзі Гродзенскага аблвыканкама Аляксандр Вярсоцкі.
– Ад сябе асабіста, ад імя нашага галоўнага ўпраўлення, Гродзенскага абласнога выканаўчага камітэта, Савета дэпутатаў шчыра і сардэчна віншую вас з гэтым прафесійным святам. Вы выбралі вельмі цікавую, вельмі адказную, няпростую прафесію. Няпростую па той прычыне, што падзеі, якія адбываюцца ў грамадстве, Рэспубліцы Беларусь, за яе межамі, не выбіраюць, калі ім адбывацца: у будні, святочныя, выхадныя дні. І журналістам трэба заўседы быць на вастрыі гэтых падзей, праблем. Вам трэба прыкласці галаву, каб падаць гэту праблему, каб падысці да яе аб'ектыўна. З гонарам з гэтай задачай спраўляецеся. Як вынік – восем рэдакцый вобласці сталі пераможцамі і лаўрэатамі рэспубліканскага конкурсу "Залатая Літара", – сказаў Аляксандр Людвігавіч.
Штогод ушаноўвае журналістаў і Гродзенская абласная арганізацыя Беларускага прафсаюза работнікаў культуры, інфармацыі, спорту і турызму. Яе старшыня Таццяна Іванова, адзначыўшы, што наш час патрабуе ад прадстаўнікоў СМІ найвышэйшага прафесіяналізму, аператыўнасці і майстэрства, таксама ўручыла заслужаныя ўзнагароды.
У гэты дзень гучала шмат цёплых слоў і віншаванняў у адрас лепшых у сваёй прафесіі. А затым для прысутных у зале быў арганізаваны святочны канцэрт. Менавіта ён стаў выдатным заканчэннем працоўнага дня.
Сёння ў Гродзенскай вобласці зарэгістравана 95 сродкаў масавай інфармацыі, у тым ліку 62 друкаваныя і 33 электронныя СМІ. Маюць свае карпункты і ўласных карэспандэнтаў рэспубліканскія тэлеканалы і друкаваныя выданні. На кожным участку працуюць толькі высокапрафесійныя спецыялісты.
