Камсамольскі рух – яркая старонка гісторыі

05 Ноября 2023 754

Камсамольцы былі са сваёй краінай заўсёды: мужна ваявалі на франтах Грамадзянскай і Вялікай Айчыннай войнаў, актыўна ўдзельнічалі ў пасляваенным адраджэнні гарадоў, асваенні цалінных земляў, працавалі ў будатрадах. Людзі старэйшага пакалення, напэўна, успомняць ударныя будоўлі, суботнікі, стук барабана і песні ля вогнішча. Камсамольскі рух – яркая старонка нашай гісторыі. І менавіта пра яе расказвае выстава, якая адкрылася ў Лідскім гісторыка-мастацкім музеі.

Акцябраты, піянеры, камсамольцы і камуністы – неад'емныя этапы сталення мільёнаў савецкіх дзяцей. І менавіта лідскім камсамольцам-падпольшчыкам, у гонар якіх названы вуліцы Ліды, прысвечана частка экспазіцыі. З чорна-белых фотаздымкаў глядзяць адкрытыя твары Аляксандра Клімко і Анатоля Качана, Матроны Наказных і Марыі Кастраміной… Па словах старшага навуковага супрацоўніка Лідскага гісторыка-мастацкага музея Наталлі Валынец, усяго пяць дзён юныя героі не дажылі да вызвалення нашага горада ад ненавіснага ворага. 3 ліпеня 1944 года яны былі расстраляны фашыстамі ў двух кіламетрах паўночней горада (цяпер мікрараён Рыбіноўскага). Пасля гэтай расправы над падпольшчыкамі патрыёты не склалі зброі, барацьба за вызваленне горада ад акупантаў працягвалася.

– Яшчэ адзін раздзел экспазіцыі расказвае пра лідскіх камсамольцаў, якія ўжо ў мірны час адраджалі горад з руін і ўдзельнічалі ў будаўніцтве Лідскага лакафарбавага завода і свінагадоўчага комплексу ў калгасе “Запаветы Ільіча”. Многія ездзілі на галоўныя будоўлі краіны, прымалі актыўны ўдзел у асваенні цалінных земляў. Напрыклад, Лідскі ўдарны атрад у 1954-1958 гадах пабываў на ўборцы ўраджаю ў Акмалінскай і Какчатаўскай абласцях Казахстана, – адзначыла Наталля Валынец.

На выставе прадстаўлены і ўнікальныя экспанаты таго часу. Гэта камсамольскія значкі і білеты, дыпломы і граматы, сімволіка і форменнае адзенне байцоў будатрадаў. Наведвальнікі могуць зрабіць здымкі на памяць у спецыяльных фотазонах, прысвечаных гэтай тэме. Як расказалі ў музеі, у людзей старэйшага ўзросту выстава, прысвечаная камсамолу і яго найлепшым традыцыям, абавязкова выкліча цёплыя ўспаміны, а ў маладога пакалення – зацікаўленасць. Пабываць на ёй адназначна варта ўсім. Працаваць яна будзе да канца лістапада.