З упэўненасцю ў сваіх навыках
Аналіз усіх паказчыкаў прадпрыемства, планаванне перспектыўных напрамкаў развіцця з улікам эканамічнай сітуацыі ў краіне, пошук аптымальных задач і шляхоў іх вырашэння – гэтыя, а таксама многія іншыя напрамкі дзейнасці ахоплівае вядучы эканаміст ААТ «Ліданафтапрадукт» Наталля Наркевіч. На дадзеным прадпрыемстве яна працуе адносна нядаўна – з лютага мінулага года. Да гэтага займала такую ж пасаду на ААТ «Лідахлебапрадукт».
– У любой працы маецца свая спецыфіка, у якой трэба разабрацца, – кажа Наталля Васільеўна. – Дадзены працэс няпросты, прыходзіцца вывучаць шмат новага. З іншага боку, гэта не толькі вельмі цікава, але і карысна для ўласнага развіцця, бо пастаяннае знаходжанне ў зоне камфорту расслабляе.
У юнацтве да выбару сваёй прафесіі Наталля Наркевіч паставілася адказна. Паводле яе слоў, разглядала некалькі кірункаў. Думала пра медыцыну і сферу адукацыі, але ўнутрана не адчувала ў сабе прызвання быць урачом або педагогам. Цяга да матэматычных навук і лагічны склад розуму падказалі: прафесія эканаміста – менавіта той занятак, які прыйдзецца па душы.
– Не скажу, што мая праца простая, – прызнаецца Наталля Васільеўна. – Пэўныя складанасці былі, ёсць і будуць заўсёды. Аднак я ўпэўнена ў сваіх навыках, адчуваю цікавасць да свайго кірунку дзейнасці, што і дапамагае мне рашаць усе пастаўленыя задачы.
– Я віншую сваіх калег з прафесійным святам, – кажа напрыканцы размовы Наталля Наркевіч. – Жадаю ўсім моцнага здароўя, шчасця і поспехаў на прафесійнай ніве. Карыстаючыся выпадкам, запрашаю ўсіх лідчан і гасцей горада на АЗС нашага прадпрыемства.
