На стары Новы год у сценах Лідскага замка прайшло традыцыйнае свята «Калядны фэст» (фота)
Не яны да нас, а мы да іх… Вось ужо каторы год запар супрацоўнікі раённага цэнтра культуры і народнай творчасці ўкараняюць новую традыцыю: калі не калядоўшчыкі ходзяць па хатах, а жыхары Ліды самі з задавальненнем далучаюцца да каляднай грамады. І гэтая субота пацвердзіла: прапанаваны звычай знайшоў водгук – на свята ў замак прыйшло некалькі дзясяткаў чалавек. Сабралася шмат дарослых, моладзі, дзяцей – і кожнаму знайшлася забава па густу.
– Цікавасць да традыцыі тлумачыцца тым, што свята гэтае вясёлае і лёгка адаптуецца да сучаснасці, – выказала здагадку загадчыца аддзела метадычнай і культурна-масавай работы раённага цэнтра культуры і народнай творчасці Наталля Канцавенка.
Сапраўды, кожны, хто далучыўся да каляды, з вялікай радасцю прымаў удзел ва ўсіх прапанаваных работнікамі культуры гульнях і забавах. Жыхары Ліды і ў аўтэнтычным абрадзе «Калядкі ў Лявона» ўдзельнічалі, і побытавыя танцы танцавалі, і ў народныя гульні гулялі, і карагоды вакол ёлкі вадзілі. А з якой асалодай усе спрабавалі рыбную юшку!
Цудоўна ўпісалася ў кантэкст свята і выступленне гасцей з літоўскага горада Шальчынінкая – ансамбля песні і танца “Сальчане”, які наведаў Ліду ў рамках трансгранічнага супрацоўніцтва.
– Якія вы, лідчане, малайцы! – пачала размову з журналістам “Лідскай газеты” кіраўнік ансамбля Барбара Суцкая. – Такое свята арганізавалі, такі добры, прыгожы і маляўнічы абрад прадэманстравалі. Абавязкова возьмем некаторыя моманты і сабе на заметку. Наша краіна нядаўна ступіла на шлях адраджэння народных традыцый. 2016 год нават быў аб’яўлены Годам этнаграфіі. Дзяржава, Міністэрства культуры шмат грошай накіравалі на развіццё гэтай галіны. Адзінае – такія вось народныя гулянні ў Літве больш праводзяцца ў невялікіх населеных пунктах, вёсках. Вы малайцы, што вывелі гэтую традыцыю на раённы ўзровень. Да вас безумоўна трэба прыязджаць па вопыт. Цяпер мы ўсім знаёмым будзем хваліцца, як у Лідзе калядавалі!
Чароўнае атрымалася свята, цудоўныя калядкі. Вельмі добрыя калядоўшчыкі, якія падарылі святочны настрой. Дзеткі паздзіўляліся, дарослыя пасмяяліся. Вельмі ўсё было пазітыўна і крэатыўна. Зрэшты, як заўсёды. Культработнікі рэгіёна па-іншаму і не ўмеюць. І гэта не хвальба, а прызнаны факт. Нездарма ж Ліда прызнана пераможцам рэспубліканскага конкурсу «Горад культуры ў Год культуры» ў намінацыі «Лепшы горад раённага падпарадкавання».