Акцыя «Нашы дзеці»: навагодняя формула шчаслівага дзяцінства (фота)

12 снежня стартавала штогадовая рэспубліканская дабрачынная акцыя «Нашы дзеці». Традыцыйна ў пераднавагоднія дні прадстаўнікі ўлады і грамадскасці ўдзяляюць асаблівую ўвагу дзецям, якія больш за іншых маюць патрэбу ў дапамозе дарослых. Кіраўніцтва розных узроўняў наведвае дзіцячыя ўстановы і ўручае выхаванцам падарункі.

Выязныя мерапрыемствы ў рамках акцыі прайшлі на Лідчыне ў самым пачатку тыдня. У мінулы панядзелак старшыня райвыканкама Міхаіл Карповіч наведаў дзіцячы сацыяльны прытулак УА «Лідскі раённы сацыяльна-педагагічны цэнтр». Разам з ім дзяцей з Навагоднімі святамі павіншавалі намеснік старшыні райвыканкама Віктар Пранюк і начальнік аддзела адукацыі, спорту і турызму Аляксандр Кадлубай. Пятнаццаці дзяўчынкам і хлопчыкам былі ўручаны салодкія падарункі, а калектыву ўстановы – аргтэхніка (прынтар).

У гэты ж дзень дэлегацыя наведала два дамы сямейнага тыпу, размешчаныя ў Лідзе. У іх выхоўваюцца 20 дзяцей. Кіраўнік раёна пагутарыў з выхаванцамі і бацькамі-выхавальнікамі. Госці змаглі пераканацца ў тым, што дзецям тут камфортна і ўтульна, а таксама ўручылі падарункі – рэчы, неабходныя кожнай сям'і: дакументы на мэблю і бытавую тэхніку.

У аўторак у вялікай зале раённага Палаца культуры прайшла тэатралізаваная шоу-праграма «Навагодняя казка, ці Калі ажывае дзіва». У ліку ганаровых гледачоў спектакля былі адораныя дзеці, якія паспяхова паказалі сябе і наш рэгіён на розных інтэлектуальных і творчых спаборніцтвах, конкурсах і алімпіядах. Да іх перш за ўсе і звярнуўся са словамі падзякі кіраўнік раёна, а таксама павіншаваў усіх прысутных са святамі. Дзеці, у сваю чаргу, не пакінулі старшыню райвыканкама без падарунка. Ім стала навагодняя кампазіцыя, зробленая рукамі юных лідчан. 

Прыемным сюрпрызам для дзяцей стала шоу мыльных бурбалак – падарунак усім прысутным ад гарадскіх улад. Сам спектакль-мюзікл вельмі спадабаўся дзецям і ў чарговы раз нагадаў усім пра тое, што Новы год – час цудаў і дабрыні. Яскравае касцюміраванае шоу створана калектывам РПК пры ўдзеле яго дзіцячых творчых аб'яднанняў.

Такі ж спектакль быў арганізаваны і для дзяцей з мнагадзетных сямей, выхаванцаў сацыяльнага прытулку і дамоў сямейнага тыпу. Удзельнікі і арганізатары дабрачыннага праекта «Нашы дзеці» яшчэ раз пераканаліся ў тым, што па-сапраўднаму каштоўнымі падарункамі дзецям у гэты чароўны час з'яўляюцца клопат і любоў.