Паспела жыта – выйшлі ў поле камбайны! У Лідскім раёне дадзены старт уборачнай кампаніі

02 Июля 2020 1923

Паважлівае стаўленне да хлеба, да зямлі-карміцелькі ва ўсе часы лічылася першарадным для нашага народа, а пачатак уборачнай кампаніі заўсёды суправаджаўся старажытным і прыгожым земляробчым абрадам. Вось і ў мінулую сераду ў полі каля вёскі Істакі гаспадаркі КСУП «Беліца-Агра» адбыліся «Зажынкі». 

На поле было ажыўлена: сабралася кіраўніцтва раёна, святары, работнікі сельгаспрадпрыемства і мясцовыя жыхары. Каля хлебнай нівы ў калону выстраілася тэхніка, гатовая прыняць збожжа. Атмасфера даўняга славянскага свята перадавалася ў песнях і цёплых словах да чалавека працы, збожжа. На думку земляробаў, дзякуючы святу ўраджай абавязкова будзе багатым, а надвор'е дапаможа ў яго ўборцы.

Сапраўды, зажынкавыя абрады – заўсёды прыгожае відовішча. Першы выхад жней на ніву і зажынанне невялікага снапа, які называлі «Гаспадар», у якасці пачастунка караваі з ураджаю мінулага года – гэтыя і іншыя рытуалы нашы продкі рабілі, каб дамовіцца з зямлёй і падзякаваць яе за падораны ўраджай. Не забыліся ў нас гэтыя традыцыі і сёлета. Начальніку ўпраўлення сельскай гаспадаркі і харчавання Лідскага райвыканкама Вользе Наройчык і кіраўніку сельгаспрадпрыемства «Беліца-Агра» Віктару Сінкевічу жанчыны-працаўніцы ўручылі сноп з першых каласоў як сімвал багацця і прыгажосці нашай зямлі, а таксама духмяны каравай.

– Уборачная кампанія – важны і адказны перыяд у жыцці аграрыяў, калі ўсе сілы і сродкі ў гаспадарках кінутыя на дасягненне адзінай мэты – сабраць збожжавыя якасна і ў аптымальныя тэрміны, – звярнулася да прысутных на свяце экіпажаў камбайнаў, кіроўцаў і механізатараў Вольга Анатольеўна. – Цэлы год людзі працавалі на зямлі для таго, каб атрымаць багаты ўраджай. Хочацца пажадаць усім добрага настрою, моцнага здароўя і вялікіх намалотаў.

З прывітальным словам і шчырымі пажаданнямі поспехаў у працы да прысутных на свяце звярнуўся Віктар Сінкевіч. Кіраўнік гаспадаркі выказаў надзею, што калектыў збярэ вялікі каравай, бо на тое, каб яго атрымаць, было патрачана нямала намаганняў.

– Нашы камбайны гатовыя да ўборкі, – адзначыў Віктар Сінкевіч. – Машын для адвозкі збожжа дастаткова. У механізатараў, прафесіяналаў сваёй справы, ёсць настрой на адказную, аператыўную працу. Спадзяюся, што ўкладземся ў азначаныя тэрміны. Галоўнае, каб уборачнай кампаніі спадарожнічала добрае надвор'е, жніво прайшло без паломак і непрыемных пазаштатных сітуацый. Я жадаю вялікай аддачы ў працы, каб у засеках гаспадаркі быў нарыхтаваны багаты ўраджай хлеба.

Усе добрыя справы заўсёды пачынаюцца з Божага благаслаўлення. Тут жа, на поле, з малітвай і з блаславеннем звярнуліся да хлебаробаў святары, якія акрапілі святой вадой хлебную ніву, тэхніку і галоўных герояў уборачнай кампаніі. Звонкія песні разліваліся над полем, а затым у такт адзін аднаму загулі магутныя машыны. Ганаровае права першымі выйсці ў поле было дадзена сямейнаму экіпажу Анатоля Мулінскага і Аксаны Уцюрынай. Бацька і дачка трэці сезон будуць працаваць разам.

– Мой тата ўсё жыццё прысвяціў сельскай гаспадарцы, а гледзячы на ​​яго, свой выбар зрабіла і я, – заўважыла карэспандэнту «Лідскай газеты» Аксана. –Разам працуем у адным сельгаспрадпрыемстве, а летам на адным камбайне збіраем ураджай. Не раз станавіліся тысячнікамі. Упэўненая, што ў гэтым сезоне таксама пакажам высокі пілатаж.

“Калі дзень зажынак з цяплом ды са святлом – прыбярэш загадзя з пожняй, а калі будзе дажджлівым – хлеб у снапах прарасце», – казалі ў народзе. Свята ў гаспадарцы «Беліца» прайшло ў гарачы летні сонечны дзень, які парадаваў усіх пасля дажджоў. Адзін за адным пайшлі камбайны па залатой ніве. Пачатак уборачнай кампаніі на Лідчыне пакладзены!












Поделиться
0Комментарии
Авторизоваться