У сценах старажытнага замка ў Лідзе адбыўся доўгачаканы рыцарскі турнір «Меч Лідскага замка-2017» (фота)
У дзень правядзення свята горада і фестывалю хмелю, соладу і вады “LIDBEER” насычанае культурнае жыццё бурліла і ў сценах Лідскага замка: тут праходзіў рыцарскі турнір “Меч Лідскага замка”, які даўно стаў традыцыйным для нашага горада. Арганізатары турніру – ДУ “Лідскі раённы цэнтр культуры і народнай творчасці” аддзела ідэалагічнай работы, культуры і па справах моладзі Лідскага райвыканкама і народная аматарская студыя-клуб “Dies Magna”, якая дзейнічае пры названым цэнтры.
Як і ў мінулым годзе, у турніры ўдзельнічаў конна-гістарычны клуб з Мінска “Залатая шпора”. Але былі на гэты раз у праграме мерапрыемства і пешыя рыцарскія баі з удзелам найлепшых байцоў з рыцарскіх клубаў Мінска, Слоніма, Ваўкавыска, Ліды. Быў запрошаны на турнір і клуб гістарычнай рэканструкцыі “Шатландская пяхота” з Маладзечна.
У час тэатралізаванага адкрыцця мерапрыемства лідскія рыцары студыі “Dies Magna” нагадалі гледачам аб знакавай падзеі 625-гадовай даўнасці – пагадненні 1392 года паміж стрыечнымі братамі – князямі Вітаўтам і Ягайлам, – якое было заключана ў маёнтку Востраў пад Лідай і паклала канец дзесяцігадовай міжусобнай вайне. Заключаны вечны мір – і ў гонар гэтай падзеі ў Лідскім замку вырашана правесці рыцарскі турнір.
Затым з канца XIV стагоддзя гледачы перанесліся ў XVII, у час войнаў з туркамі, у якіх прымалі ўдзел і вершнікі Вялікага княства Літоўскага, названыя “крылатымі гусарамі”. Аб гэтай старонцы гісторыі распавяло прадстаўленне “Крылатыя вершнікі Вялікага княства”, дадзенае ўдзельнікамі клуба “Залатая шпора”.
У другім аддзяленні гледачы атрымалі магчымасць больш блізка пазнаёміцца з рыцарамі “Залатой шпоры” ў час тэатралізаванага шоу “Рыцарскія забавы”. Адважныя рыцары на конях секлі на скаку качаны капусты, ударалі дзідамі ў замацаваны на жэрдцы шчыт-“сарацыну”, падымалі дзідамі, таксама на скаку, кольца і хустку прыгожай дамы… Варта адзначыць, што ва ўсіх гэтых забавах разам з рыцарамі-мужчынамі ўдзельнічала і жанчына – Айгюль Татарская (Карына Ахраменка). Самаму старэйшаму ўдзельніку рыцарскіх забаў – Аляксандру Усціновічу – 68 гадоў.
У трэцім аддзяленні турніру, як і ў мінулым годзе, рыцары “Залатой шпоры” арганізавалі інтэрактыўнае коннае шоу “Пад харугвамі Грунвальда”, у якім, акрамя саміх рыцараў, удзельнічалі некаторыя гледачы-мужчыны. З гледачоў-ахвотнікаў была набрана дадатковая харугва для ўдзелу ў знакамітай Грунвальдскай бітве, ім далі дзіды і шчыты, і яны стаялі шчыльнай сцяной перад націскам тэўтонцаў.
Але не толькі рыцары клуба “Залатая шпора” радавалі гледачоў сваімі выступленнямі на працягу турніру. Як ужо адзначалася, у кожным аддзяленні ладзіліся пешыя рыцарскія баі з удзелам найлепшых байцоў з рыцарскіх клубаў Мінска, Слоніма, Ваўкавыска, Ліды, выступалі перад публікай і шатландскія пехацінцы з Маладзечна.
Па выніках каманднага пешага турніру “Турнір пяцёрак” пераможніцай стала каманда рыцарскага клуба “Сякамбры”, па выніках індывідуальнага пешага турніру “Меч-бастард” найлепшым з найлепшых байцоў быў прызнаны пан Ярамір, шматразовы пераможца рыцарскіх турніраў як у Беларусі, так і за яе межамі.
Рыцарскія прадстаўленні і баі разбаўляў музычнымі нумарамі даўно знаёмы лідчанам гурт сярэднявечнай музыкі “Hardwood” з Мінска. У заканчэнне турніру з піратэхнічным прадстаўленнем і фаер-шоу выступіў магілёўскі тэатр агню “Maori”. Але на гэтым забавы ў Лідскім замку не скончыліся – жадаючых патанчыць чакала начная дыскатэка 80-90-х.
***
Больш падрабязны рэпартаж з рыцарскага турніру, уключаючы інтэрв’ю з яго ўдзельнікамі, чытайце ў бліжэйшым нумары “Лідскай газеты”.